С.А. Новгородов аатынан Чурапчы орто оскуолатын саха тылын, литературатын учууталлара — В.К. Дьяконов, С.И. Еремеева, Е.В. Иванова, И.И. Неустроева, С.Д. Платонова, Л.Е. Попова бэһис кылаас үөрэнээччилэрин ааҕар сатабылларын сайыннарар, толкуйдатар сорудахтардаах «Ыллык» диэн дьарык тэтэрээттэрэ бу күннэргэ бэчээттэнэн таҕыста.

Тэтэрээткэ оҕо төрөөбүт тылын баайын тулалыыр эйгэтин кытта ситимнээн, өбүгэтин үгэһин кэрэхсээн улаатарыгар олук ууран БҮөСЫ ирдэбилигэр тирэҕирэр тиэкистэр, сорудахтар, эрчиллиилэр киирдилэр.
Барыта 34 дьарык баар. Үөрэх дьылын устата ыйдар тиэмэлэринэн арахсаллар. Холобура, кулун тутарга сүрэхтээх буолуу, үлэһит киһи, онтон сэтинньигэ тулуур, сыра-сылба туһунан тиэкистэр уонна сорудахтар суруллубуттар. Бу тэтэрээт үөрэнээччилэргэ төрөөбүт тылларын баһылыылларыгар, тулалыыр эйгэни кытта билсэллэригэр олус туһалаах буолуо.