Бэҕэһээ, олунньу 29 күнүгэр, "Социальная педагогика в школе: традиции и инновации" диэн Чурапчы улууһун  социальнай педагогтарын семинара А.П. Илларионов аатынан Хаяхсыт орто оскуолатыгар  үрдүк таһымҥа тэриллэн, былааннаммыт үлэ  барыта ыытыллан, наһаа үчүгэйдик буолан ааста. 

 

 

Семинар музей көрүүттэн саҕаланна,  баай, киэҥ историялаах экспонаттар наһаа үчүгэйдик хараллан туралларын, саҥа оскуолаҕа элбэх хостоох музей баарын хайгыы, сэҥээрэ көрдүлэр.

Семинары алын кылаас уолаттара "Ойор тэбэр оҕо саас" диэн уус-уран ааҕыыларынан аһан, кэлбит ыалдьыттар хайгыы көрдүлэр, иһиттилэр.  

Оскуола директора Федор Игнатьевич Борисов кэлбит социальнай педагогтарга махтанан, нэһилиэк, оскуола историятыттан сырдатан туран эҕэрдэтин эттэ, семинар үлэтиттэн элбэх саҥаны  ылыахтара диэн эрэнэн  ситиһиини баҕарда. Чурапчы улууһун үөрэҕин управлениятыттан психолого-педагогическай сулууспа сүрүн специалиһа Лена Герасимовна Винокурова эҕэрдэ тыл эттэ. 

 

 

Семинар сүрүн чааһыгар Хаяхсыт оскуолатын  оҕо доруобуйатын тупсарар үлэҕэ инструктора Саргылана Прокопьевна Леонтьева оҕо аһылыгын тэрийиитин туһунан наһаа көмөлөөх, интэриэһинэй иһитиннэрии оҥордо. Онтон оскуола социальнай педагога Любовь Ивановна Филиппова баай уопутуттан үллэстэн үлэтин туһунан кэпсээтэ. Сүрүн тэрээһин кэнниттэн улуус социальнай педагогтарын методическай холбоһук салайааччыта, Хатылы орто оскуолтын социальнай педагога Надежда Константиновна Кривошапкина семинар кыттыылаахтарыгар тренинг ыытта. Минньигэс астаах остолобуойбутугар эбиэт быыһыгар Дириҥ, Хадар, Чурапчы орто оскуолаларыгар саҥа анаммыт социальнай педагогтарга Надежда Кривошапкина, Любовь Филиппова методическай көмө оҥордулар, сүбэ-ама биэрдилэр. 

 

Эбиэт кэннэ 7 кылаас үөрэнээччилэригэр Ожулун орто оскуолатын социальнай педагога Надежда Николаевна Кривошапкина "Мы в ответе за свои поступки" диэн темаҕа сэргэх кылаас чааһын ыытта. Улуус гимназиятын социальнай педагога Вероника Михайловна Абрамова төрөппүт комитетын үлэтин туһунан кылаас салайааччыларыгар төрөппүт комитетын чилиэттэригэр сырдатта.        

Түмүккэ Лена Герасимовна инники былааннары, соруктары, үлэ туһунан билиһиннэрдэ. Семинар кыттыылаахтара санааларын атастастылар, элбэҕи  билэн, көрөн-истэн, астынан, көмө-ылан оскуола коллективыгар махтанан туран оскуола иитэр-үөрэтэр үлэтин бары бииргэ үлэлиирин бэлиэтээн тарҕастылар.