Саха АССР Үтүөлээх тренера Иван Егорович Захаров 95-сааһыгар анаммыт үөрэнээччилэр сайыҥҥы спартакиадалара.

     Ыам ыйын 15 күнүгэр Чурапчы нэһилиэгэр Боотур Уус стадиоҥҥа Саха Республикатын Үтүөлээх тренерэ, “20 үйэ чулуу үлэһитэ” , “Учууталлар учууталлара” бэлиэлэр хаһаайыннара, спорт ветерана Иван Егорович Захаров 95 сылыгар аналлаах оскуола үөрэнээччилэригэр сүүрүүгэ спартакиада буолан ааста.

       Иван Егорович спорду олоҕун аргыһа оҥостубута. Кини аата спортсмен быһыытынан Чурапчы улууһун историятыгар өрүү чиэстээхтик ааттанар. Ол туоһутунан 1965с. 100м сири сүүрүүгэ улуус рекордун олохтообута, 34 сыл халбаҥнаабатаҕа, 1956с 200м. сири сүүрүүгэ олохтообут рекордун 29 сыл биирда быһый атахтаах ылбатаҕа.

     Иван Егорович Дириҥ оскуолатыгар өр сылларга тахсыылаахтык үлэлээбитэ, элбэх улахан спортсменнары иитэн-такыйан таһаарбыта. Ол курдук бастакы марафонец Куличкин Николай Петрович, республика, Дальнай Восток чемпиона Егор Михайлович Феофанов, РФ спордун маастара, марафоҥҥа республика үс төгүллээх чемпиона Гаврил Федорович Нохтунскай, СР уонна РФ атах оонньуутугар спорт маастара Николай Николаевич Адамов, СР уонна РФ атах оонньуутугар спорт маастара Петр Семенович Посельский, РСФСР спордун маастара Иван Иванович Чиркоев, СР уонна РФ атах оонньуутугар спорт маастара Иван Иванович Захаров, СР уонна РФ атах оонньуутугар спорт маастара Дмитрий Дмитриевич Эверстов , Республика Урожай, ДСО чемпионката Варвара Николаевна Дмитриева, нуучча лаптатыгар, волейболга , спортивнай хаамыыга республика чемпиона Николай Иванович Дьяконов уонна да атыттар республика, Россия араас муннуктарыгар кылбар кыайыылары ситиһэн тренердэрин элбэхтик ааттаппытттара.

         Спартакиада үөрүүлээх арыллыынан саҕаланна. Чурапчы улууһун үөрэҕин управлениятын начальнигын солбуйааччы Винокурова И.Г., Оҕо спортивнай оскуолатын директорын солбуйааччы Артемьев С.С., Дириҥ агрооскуолатын директорын иитэр үлэҕэ солбуйааччы Попова Т.И., Иван Егорович үөрэнээччитэ Нохтунскай Г.Ф., биир кэмҥэ үлэлээбит физкультура учууталларын аатыттан Дьяконов В.С. үтүөлээх тренери, улахан спортсмены ахтан-санаан аастылар, эдэр спортсменнарга кэс тыл эттилэр. Иван Егорович төрөппүт кыргыттара Сергеева Т.И., Платонова А.И. тапталлаах аҕаларын истиҥ тылынан санаан аастылар, өрүү холобур оҥостоллорун кэпсээтилэр. Үөрүүлээх тэрээһини Дириҥнээҕи оҕо музыкальнай оскуолатын иитиллээччилэрэ ыллаан – үҥкүүлээн киэргэттилэр.

         Спартакиадаҕа үөрэнээччилэр кылгас дистацияларга 100м. уонна 400м. илин –кэлин түһүстүлэр, уһун дистанцияларга 1500м, 2000м күрэхтэстилэр уонна эстафетанан түмүктээтилэр. Ол курдук барыта 13 оскуола, 120 эдэр сүүрүк кыттыыны ылла.

         Түмүккэ кылгас дистанцияларга 100м кыргыттарга бастакы Другина Диадора (ЧРССШИОР), Кобякова Дайаана (Хатылы) иккис, үһүс Попова Күннэй (ЧСОШ САН); 400м бастакы Афанасьева Айсена (ЧРССШИОР), иккис Анемподистова Галя (Хадаар), үһүс Дьячковская Тина(ЧСОШ 2) ; уолаттарга 100м бастакы Фомин Саша (ЧСОШ САН), иккис Лукин Ваня (гимназия), үһүс Корякин Стас (Дирин); 400м бастакы Охлопков Харысхал (ЧРССШИОР), иккис Борисов Арылхан (Төлөй), үһүс Васильев Ньургун (гимназия) буоллулар. Уһун дистанцияларга 1500м кыргыттарга бастакы Чорду Алена (ЧСОШ 2), иккис Сыромятникова Сафина (ЧРССШИОР), үһүс Сивцева Аина (ЧСОШ САН); ЧРССШИОР) уолаттарга 2000м бастакы Куличкин Айтал (Мындагай), иккис Григорьев Айтал (Хадаар), үһүс Холмогоров Володя (Хатылы) инники кирбиигэ таҕыстылар. Эстафетаҕа кыргыттарга ЧРССШИОР хамаандата бастаата, иккис ЧСОШ -2, үһүс миэстэ ЧСОШ САН хамаандата буолла. Уолаттарга эстафетаҕа бастакы Мындагай, иккис Хадаар, үһүс ЧСОШ САН хамаандалара таҕыста.

            Чурапчы улууһун үөрэҕин управленията, чэпчэки атлетикаҕа федерацията, спорт ветераннара, физкультура учууталларын түмсүүтэ, тренердэр, И.Е. Захаров оҕолоро, сиэттэрэ уонна И.Е. Федосеев-Доосо аатынан Дириҥ орто агрооскуолата эдэр спортсменнарга бириистэри туттардылар.

            Иван Егорович төрөппүт оҕолоро аҕаларын кэриэһигэр анаммыт күрэхтэһии үрдүк таһымнаахтык ааспытынан тэрийээччилэргэ, Чурапчы улууһун үөрэҕин управлениетыгар, И.Е. Захаров үөрэнээччилэригэр, Г.Ф. Нохтунскайга, В.С. Дьяконовка, Дириҥнээҕи агрооскуолаҕа уонна А.В. Посельская аатынан Дириҥнээҕи оҕо искусство оскуолатыгар махталларын биллэрдилэр.

Ыстатыйаны суруйда Марфа Далбаева, Дириҥ орто агрооскуолатын учуутала.

Ыам ыйын 16 күнэ 2024 сыл.