Саҥа, 2024-2025 үөрэх дьыла саҕаланар үөрүүлээх күнүнэн күндү үөрэнээччилэри, улуус учууталларын уонна ытыктабыллаах ветераннарбытын Үөрэх салалтатын аатыттан итиитик-истиҥник эҕэрдэлиибит.
Оҕону иитиигэ анаммыт республика педагогтарын уонна общественноһын Атырдьах ыйынааҕы сүбэ мунньаҕар үөрэхтээһин тиһигэр сүрүн соруктар ыйылыннылар. Ол курдук, Россия үөрэҕириитин миниистирэ Сергей Кравцов биир кэлим иитии уонна үөрэхтээһин эйгэтин тэрийии үлэтэ салҕанарын эттэ, оскуолалар биир федеральнай программаҕа киирэн, биир учебнигынан үөрэнэллэрэ хааччыллыа. Быйыл үлэҕэ уонна идэни талыыга, дойдуга, кинини көмүскээһиҥҥэ үүнэр көлүөнэ суолталаах сыһыанын олохтуур «Основы безопасности и защита родины» уонна «Үлэ» уруоктара киириэхтэрэ. Дьиэ кэргэн сыла биллэриллэн иитиигэ анаммыт үгүс дьаһаллар тиэмэлэрэ дьиэ кэргэн сыаннастарын кытта ситимнэниэхтэрэ.
СӨ Ил Дархана Айсен Николаев республика үөрэхтээһинэ уһуйаантан саҕалаан университеттарга тиийэ биир кэлимник үлэлиэхтээҕин этэн туран, үөрэхтээһин эйгэтин тупсуута - республика экономиката үрдээһинигэр, дьон олоҕо тупсарыгар быһаарар суолталааҕын ыйда. Педагогтар идэлэрин таһымын үрдэтии олохтоох былаас сүрүн соругунан хааларын эттэ, хас биирдии педагог идэтин таһымын үрдэтэригэр тус программалаах буолара ситиһиллиэхтээҕин ыйда. Маны тэҥэ иитии, үөрэтии хаамыытыгар айар индустрия тэрилтэлэрин кыахтара киэҥник туһаныллара тоҕоостооҕо бэлиэтэннэ. Үөрэх хаачыстыбатын тупсарыы, саҥа предметтэри олохтоохтук киллэрэн үөрэтии, эбии үөрэхтээһининэн оҕону барытын хабыы үүнэр үөрэх дьылын сүрүн соруктарынан буолаллар, ону ситиһэргэ хас биирдиибит бэйэтин кылаатын киллэриэхтээх.
От ыйын 8-10 күннэригэр Мэҥэ Хаҥаласка ыытыллыбыт 20-с Тыа сирин педагогическай дьаарбаҥкатыгар улуус 200 тахса педагога 73 бырайыагынан ситиһиилээхтик кытынна. Улууспут оҕолоро сайын устата араас лааҕырдарга дуоһуйа сынньаннылар, сайыннылар, дьиэ кэргэннэригэр көмө-тирэх буоллулар. Барыта реестрга киирбит 24 лааҕыр үлэлээтэ, 1155 оҕо хабылынна. Анал байыаннай дьайыы кыттыылаахтарын оҕолоругар Саха сиригэр уонна Краснодарскай кыраайга сынньанарга 35 путевка көрүлүннэ. Оскуоланы 225 оҕо түмүктээбититтэн 4 оҕо кыһыл көмүс, 15 оҕо үрүҥ көмүс мэтээлинэн бүтэрдилэр. Бүгүҥҥү туругунан 73 оҕо үрдүк үөрэххэ киирдэ. Эдэр спортсменнарбыт сайыҥҥы күрэхтэргэ ситиһиилээхтик кытыннылар. «Спортивные якутяне» үөрэнээччилэр спартакиадаларыгар 90 оҕо кыттан 2-кис бөлөххө улуус хамаандата кыайыылааҕынан ааттанна. Саха сиригэр ыытыллыбыт 8-с «Азия оҕолоро» оонньууларга 33 оҕо кытынна. Чурапчы улууһугар Ыал саргыта сылыгар “Дьарыктаах дьоһун ыал” анал ааты 5 дьиэ кэргэн ылан оонньуу аһыллыытыгар путевканан наҕараадаламмыта.
Улууспутугар быйыл 26 оскуолаҕа 3909 оҕо үөрэниэҕэ, 324 оҕо маҥнайгы кылааска киирэр. Көмүс күһүммүт Билии аанын арыйар кэрэ-бэлиэ күнүнэн эҕэрдэлээн туран, оскуола боруогун саҥа атыллыыр маҥнайгы кылаас үөрэнээччилэригэр СӨ Ил Дархана Айсен Николаев аатыттан алгыстаах Үөрэнээччи дневнига туттарыллар. Үөрэх, билиини ылыы – омукпут, республикабыт сарсыҥҥыта, онон бары кыһаллан үөрэниҥ, төрөөбүт дойдубутун харыстыыр, сайыннарар дьон буола улаатыҥ. Билиини иҥэрэр учуутал дьоммутугар айымньылаах, таһаарыылаах үлэни, үүнэр-сайдар аартыктар арылла турдуннар, дьиэ кэргэҥҥитигэр дьоллоох олоҕу баҕарабыт!
