Үөрэх үлэһиттэрин балаҕан ыйынааҕы сүбэ мунньахтарын иккис күнүгэр Чурапчы улууһун баһылыга С.А. Саргыдаев көҕүлээһининэн «Иитии үлэтин туруга уонна соруктара» төгүрүк остуол ыытылынна. Манна улуус үөрэҕин салалтата, оскуолалар дириэктэрдэрэ, дириэктэри иитэр үлэҕэ солбуйааччылар, оскуолалар социальнай-психологическай сулууспаларын үлэһиттэрэ кыттыыны ыллылар. Чурапчы улууһун үөрэҕин салаатын начальнига Посельскай Ю.П. оҥорбут дакылаатын тула аһаҕас кэпсэтии буолла. Педагогтар оскуолаларыгар иитии өттүгэр ыытар үлэлэрин уопутун уонна баар итэҕэстэри туоруурга санааларын үллэһиннилэр.

Улуус баһылыга Степан Анатольевич Саргыдаев иитиигэ былааннаах, дириҥ ис хоһоонноох, киэҥ хабааннаах үлэ ыытыллыахтааҕын, төрөппүтү кытары ыкса ситим олохтонуохтааҕын эттэ. Уустук балаһыанньаҕа түбэспит оҕолору кэмигэр таба көрөн, өйөөһүн үлэтин сөптөөхтүх ыытарга, саҥа сиргэ үөрэнэ кэлбит оҕолор адаптацияны ааһыыларын кэтээн көрөргө сорудахтаата. Хас биирдии үөрэнээччини эбии үөрэхтээһининэн сүүс бырыһыан хабыллыахтаах, манна кылаас салайааччылара эбии үөрэхтээһин үлэһиттэрин кытта ыкса үлэлииллэригэр, итиэннэ оҕо эбии дьарыкка сылдьарын тус хонтуруолларыгар ылалларыгар сорук туруорда. Иитии үлэтигэр маннык аһаҕас кэпсэтиилэр чиэппэр аайы ыытыллыахтара, оскуолаларга бэрээдэк тула кэпсэтиилэр тэриллиэхтэрэ.