Алтынньы 14 күнүгэр Уйбаан Доосо аатынан Дириҥ орто агрооскуолатыгар «Боотур Уус сыдьааннара» муниципальнай бырагыраама чэрчитинэн "Өбүгэ оонньуута-2024" ыытылынна. Бу күрэх улуус 10 оскуолатыттан 36 спортсмены түмтэ. Бары да наһаа дэгиттэр сайдыылаах оҕолор кэлбиттэр.
Саха төрүт оонньуулара оҕону түргэн толкуйга, сымса хамсаныыга, олоххо бигэ тирэхтээх буола улаатарга үөрэтэр улахан суолталаахтар.
https://www.churap.ru/index.php?option=com_k2&view=item&id=1123:%D3%A9%D0%B1%D2%AF%D0%B3%D1%8D-%D0%BE%D0%BE%D0%BD%D0%BD%D1%8C%D1%83%D1%83%D1%82%D0%B0-2024&Itemid=101#sigProId5787080cc6
Хабылык, хаамыска таһыма наһаа да ырааппыт, Төлөй оскуолатын тренерэ Мария Капрынова олох икки илиитинэн тэҥинэн оонньоон көрдөрдө, илиилэригэр араас ахсааннаах хабылыктан биир өттүттэн биир хабылыгы иккис илиитигэр хаалбыт үс хабылыгы тэҥинэн хабыахтаах, ону олох ааһан иһэн оҥорор. Бу аата мэйиитэ икки полушариенан тэҥҥэ үлэлээн, хамаанда бөҕө биэрэн эрдэҕэ.
Тутум эргиири эмиэ бастакы мүнүүтэҕэ сөп өттүгэр, онтон иккис мүнүүтэҕэ соххор өттүгэр оҥорор гыммыттара дьэ оҕо бэйэтин этин сиинин талбытынан салайынар буола улаатарыгар күүстээх дьарык буолар буолбут.
Хапсаҕай урут да быйыл да сылбырҕалар, сымсалар күрэхтэрэ аатырыан аатырар, көҥүл тустууттан олох атын көрүҥ буоларын бэҕэһээ илэ, чугастан көрдүбүт.
Кириэс тэбии диэн оонньууну перемена аайы, били биһиги урут скакалкалыы тахсарбыт курдук оонньуур оонньуулара буолуон сөп эбит. Баланс, координация, эт-хаан сайдыыта барыта баар. Атах оонньуута урут да быйыл да кынаттаах курдук чэпчэки, кыахтаах буолууну көрдөрөр күрэх. Марк Никитин диэн Мырыла оҕото, быйылгы "Азия оҕолоро" күрэх кыайыылааҕа кэлэн ыстанна. Дьэ ити курдук наһаа үчүгэй көстүүлээх, кыраһыабай көрүҥнэрдээх күрэҕи көрдүбүт.
Күрэхтэһии түмүгүнэн 4 эдэр спортсмен:
9-10 кылаас уолаттарыгар Никитин Марк, Мырыла.
9-10 кылаас кыргыттарыгар Прокопьева Айгуль, Мырыла.
11 кылаас уолаттарыгар Попов Петя, ЧРССШИОР им. Д.П.Коркина
11 кылаас кыргыттарыгар Захарова Анна, Гимназия.
алтынньы 15 күнүгэр республикаҕа Чурапчы улууһун көмүскүү барыахтара.
Сахалыы спорт көрүҥнэрэ сайдан оҕолорбутун саҥа ситиһиилэргэ кынаттыы турдуннар!
Петрова Валентина Николаевна, Дирин орто агрооскуолатын төрөппүтүн комитетын председателэ.
