«Үс ситим – үс кэрэ» улуустааҕы куонкурус Алтынньы 25 күнүгэр «Боотур Уус сыдьааннара» бырагыраама чэрчитинэн, Саха өрөспүүбүлүкэтигэр ийэ, Аан дойдуга аҕам саастаахтар уонна кыыс оҕо күннэригэр аналлаах «Үс ситим – үс кэрэ» улуустааҕы куонкурус Одьулуун орто оскуолатыгар ыытылынна. Кыыс оҕо олоҕу салҕааччы, алаһа дьиэ араҥаччыта буоларын өйдөтөр, кэрэни кэрэхсииргэ, үчүгэйи үксэтэргэ уһуйар, эбэ, ийэ истиҥ сыһыаннарын холобуругар кыыс оҕону иитэр сыаллаах күрэх 2018 сылтан биһиги улууспутугар тиһигин быспакка ыытыллан кэллэ. Күрэххэ Чурапчы улууһун 11 оскуолатыттан истиҥ-иһирэх ийэлэр, эйэҕэс эбэлэр, нарын-намчы кыргыттар биир түһүлгэҕэ түмсэн кэрэ эйгэни үөскэттилэр, үс көлүөнэни ситимниир истиҥ сыһаннарынан, үтүө холобурдарын көрдөрдүлэр. Тэрээһин үөрүүлээх чааһын улуустааҕы үөрэх салалтатын иитии уонна эбии үөрэхтээһин отделын салайааччыта Евгения Ивановна Чичигинарова, улуустааҕы бэтэрээннэр сэбиэттэрин бэрэссэдээтэлэ Мотрена Николаевна Матвеева, Чурапчы улууһун төрөппүттэрин сэбиэтин бэрэссэдээтэлэ Парасковья Васильевна Гладкина кыттааччыларга эҕэрдэлэрин тиэрдэн, ситиһиини баҕаран саҕалаатылар.
«Үс ситим – үс кэрэ» күрэх дьүүллүүр сүбэтигэр үлэлээтилэр: Мотрена Николаевна Матвеева, улуустааҕы бэтэрээннэр сэбиэттэрин бэрэссэдээтэлэ; Алина Ивановна Собакина, «Радость» оҕо дьоҕурун сайыннарар киин специалиһа; Мария Петровна Баина, «Россия Ийэлэрэ» улуустааҕы түмсүү чилиэнэ.
Күрэх түөрт түһүмэҕинэн ыытылынна: 1 түһүмэх. «Кэрэ ситимэ» – бэйэни билиһиннэрии; 2 түһүмэх «Кэрэни кэрэхсиибит» – маастар-кылаас; 3 түһүмэх «Оҕо сайдар кэскилэ-көлүөнэ быстыбат ситимэ» – оҕону иитиигэ ыйытыктарга хоруй; 4 түһүмэх «Эбээ аптаах хоппото» – дьиэ кэргэн 70-80-90 сыллардааҕы гардеробуттан мода көрдөрүү. Түмүккэ, дьүүллүүр сүбэ быһаарыытынан «Үс ситим-үс кэрэ» күрэх кыайыылаахтара, анал ааттар, ону тэҥэ тэрийээччилэр ааттарыттан анал бириистэр туттарылыннылар.
1 миэстэ - Алефтина Тарасовна, Алевтина Николаевна, Алгыстаана Пономаревтар дьиэ кэргэн, Одьулуун орто оскуолата;
2 миэстэ - Варвара Кирилловна, Диана Александровна, Айыллаана Струкиннар дьиэ кэргэн, Г.Д. Протодьяконов аатынан Алаҕар орто оскуолата;
3 миэстэ - Марфа Владимировна, Ая Григорьевна, Амелия Чичигинаровтар дьиэ кэргэн, В.С. Соловьев-Болот Боотур аатынан Хатылы орто оскуолата;
«Өй-санаа ситимэ» анал аат - Елена Яковлевна, Екатерина Степановна, Дарина Софроновтар дьиэ кэргэн, С.С. Яковлев-Эрилик Эристиин аатынан Чакыр орто оскуолата;
«Удьуор ситимэ» анал аат - Татьяна Григорьевна, Туяра Егоровна, Сахая Потаповтар дьиэ кэргэн, В.С. Яковлев-Далан аатынан Кытаанах орто оскуолата;
«Төрүт ситим» анал аат - Мария Константиновна, Саманта Алексеевна, Милана Беляевтар дьиэ кэргэн, Г.П. Башарин аатынан Сылан орто оскуолата;
«Кэрэ ситимэ» анал аат - Александра Романовна, Мария Гаврильевна, Диана Николаевтар дьиэ кэргэн, Р.И. Константинов аатынан Амма орто оскуолата;
«Талба талаан» анал аат - Саргылана Ильинична, Акулина Петровна, Вика Сивцевтэр дьиэ кэргэн, Н.Д.Субуруускай аатынан Болтоҥо орто оскуолата;
«Иэйии ситимэ» анал аат - Анастасия Афанасьевна, Анисия Алексеевна, Настя Федоровтар, И.Е.Федосеев-Доосо аатынан Дириҥ орто АГРО оскуолата;
«Истиҥ сыһыан ситимэ» анал аат - Татьяна Лукинична, Светлана Семеновна, Амилина Бехтюевтар дьиэ кэргэн, С.А.Новгородов аатынан Чурапчы орто оскуолата;
«Уйгу ситимэ» анал аат - Мотрена Кирилловна, Күннэй Борисовна, Айаана Пестряковтар дьиэ кэргэн, Д.Г. Барашков аатынан Бахсы орто оскуолата. «Кэрэ – кэрэни үөскэтэр, быстыспат ситим салҕанан көлүөнэттэн көлүөнэҕэ бэриллэр айылҕалаах. Харыстааҥ кэрэни, харыстааҥ кыыс оҕо быстыспат кэрэ ситимин» – диэн олус дириҥ суолталаах тылларынан тэрээһин түмүктэннэ. Үс көлүөнэ кэрэ ситимэ үтүөнү түстүү, үөрүүнү үксэтэ турдун!
