Одьулуун оскуолатыгар Гаврил Иванович Егоров-Биилин төрөөбүтэ 115 сылыгар аналлаах бэлиэ түгэн буолан ааста.
Ахсынньы 18 күнүгэр, Одьулуунтан төрүттээх үбүлүөйдээх суруйааччылартан биирдэстэрэ – Гаврил Иванович Егоров-Биилин төрөөбүтэ 115 сылыгар аналлаах тэрээһини Одьулуун орто оскуолатын бибилэтиэкэтэ итиэннэ тыл учууталларын методическай холбоһуга иилээн-саҕалаан тэрийдилэр.
Бэлиэ күн оскуола үһүс этээһигэр Гаврил Иванович Егоров-Биилин олоҕун кэрчиктэрин, айар үлэтин сырдатар истиэндэтэ арыллыытыттан саҕаланна. Истиэндэ ис хоһоонугар Акулина Неустроева, дизайн, таҥыы өттүгэр Марселина Петрова үлэлэстилэр. Ыытааччы Анна Аржакова Биилиҥҥэ анаммыт истиэндэни оҕолорго олус кэрэхсэбиллээхтик сырдатта.
Тэрээһин сүрүн чааһыгар саалаҕа мустубут оҕолорго, педагогтарга эҕэрдэ тылларын эттилэр –«Одьулуун нэһилиэгэ» тыа сирин түөлбэтин дьаһалтатын сүрүн специалиһа, СӨ муниципальнай сулууспатын туйгуна, Одьулуун нэһилиэгин бочуоттаах олохтооҕо Ефимова Ульяна Михайловна, оскуола дириэктэрэ Иннокентий Бекянов, СӨ суруйааччылар «Иэйии» КСТ регионнааҕы «Айар кут» поэттар уонна прозиктар сойуустарын чилиэнэ, «Чурапчы» литературнай түмсүү чилиэнэ, «Кыым» хаһыат общественнай корреспондена, СӨ үөрэҕириитин туйгуна Наталья Сергеева – Аана кыыһа.
Үбүлүөйдээх биир дойдулаахтарбыт хаан-уруу аймахтара кыттыыны ылбыттара улахан суолталаах. Ол курдук, Г. И. Егоров - Биилин аймахтара – Тимур, Вилена Седалищевтар, Д. Г. Дыдаев аймаҕа – Милена Егорова, Г. Д. Ефимов аймаҕа – Айта Ефимова, В. Н. Егоров - Тумарча сиэн балта – алын сүһүөх учуутала Зоя Егорова уонна Д. И. Дьячковскай – Сэһэн Боло аймаҕа Анна Сорокоумова аатыттан – Одьулууннааҕы модельнай бибилэтиэкэ сэбиэдиссэйэ Таисия Григорьева үөрүүлээх быһыыга-майгыга тэрээһини арыйдылар. Алтыс кылаас үөрэнээччилэрэ бу киэн туттар биэс дьоммут туһунан сиһилии сырдаппыттара хайҕабыллаах.
Биир бэлиэ түгэнинэн, Яна Биилина, Г. И. Егоров - Биилин сиэнэ куйаар ситиминэн ыыппыт эҕэрдэтин көрүү-истии буолла. Кини эһэтин туһунан олус элбэҕи кэпсээтэ уонна Одьулуун оскуолата үйэтитиигэ, киэҥ эйгэҕэ сырдатыыга үлэлэһэрин иһин махтанарын биллэрдэ.
Анюта Рожина, Сайнаара Дьячковская, Миша Яковлев уонна Күннэй Макарова Гаврил Иванович Егоров-Биилин хоһооннорун иэйиилээхтик ааҕан эҕэрдэлээтилэр. Оттон Вилена Седалищева уонна Саша Брызгаев Гаврил Иванович туһунан чинчийэр үлэлэрин билиһиннэрдилэр.
Оскуола бибилэтиэкэтэ уонна тыл учууталларын холбоһуга көҕүлээбит «Күргүөм ааҕыы» бырайыак чэрчитинэн, бүгүн Биилин бэйиэт «Дорообо, Дьабыыла!» хоһоонун үөрэнээччилэр бары дорҕоонноохтук күргүөмүнэн аахтылар. Бу хоһоон хас биирдии тыла Одьулуун оҕолоругар олус күндү, истиҥ өйдөбүлү үөскэппитэ буолуо, хоһоону сүрэхтэригэр иҥэрэн куруук киэн тутта ааҕыахтара диэн эрэниэҕи баҕарыллар.
Салҕыы алын сүһүөх оҕолоругар анаан нэһилиэкпит модельнай бибилэтиэкэтин сэбиэдиссэйэ Таисия Григорьева «Биилин бэйиэт. Кини кимий?» библиотечнай чааһы, орто уонна үрдүкү кылаас оҕолоругар «Биилинниин бииргэ» оонньуу түһүлгэтин Акулина Неустроева, Руслан Карпов, Туйара Максимова иилээн-саҕалаан ыыттылар.
2025 сылга Одьулуунтан төрүттээх биллэр-көстөр, киэн туттар дьоммут үбүлүөйдээх сылларын оскуола, нэһилиэк, өрөспүүбүлүкэ таһымыгар общественноска киэҥник биллэрэн, сырдатан бэлиэтээтибит. Ол курдук, «Саҥа олох» улуус хаһыатыгар сырдатыы үлэтэ ыытылынна. Үөрэнээччилэр, учууталлар «Саха» көрдөрөр-иһитиннэрэр хампаанньа “Саҥа күн” биэриитигэр, сонуннарга уһулуннулар, Саха өрөспүүбүлүкэтин национальнай библиотекатын историческай саалатыгар, Гуманитарнай чинчийии уонна хотугу аҕыйах ахсааннаах омуктар кыһалҕаларын үнүстүүтүгэр ыытыллыбыт үбүлүөйдээх тэрээһиннэргэ, научнай-практическай кэмпириэнсийэлэргэ көхтөөх кыттыыны ылыллылар.
Татьяна Заболоцкая салайааччылаах тыл учууталларын методическай холбоһугун учууталлара уонна оскуола бибилэтиэкэтэ куолаан үлэлэрин түмүгэр хас да саҥа бырайыак олоххо киирдэ. Олортон биирдэстэрин бүгүн бар дьоммутугар билиһиннэрдибит. Одьулуунтан төрүттээх суруйааччылар, бэйиэттэр айымньыларын аудио киэпкэ устан үйэтитэр, киэҥ эйгэҕэ тарҕатар сыаллаах «Дорообо, Дьабыыла!» бырайыакка сыллата оскуоланы бүтэрээччилэр кыттыахтара. Быйыл биир дойдулаахпыт Гаврил Егоров хоһооннорун 11 кылаас үөрэнээччилэрэ дорҕоонноохтук аахпыттарын альбом оҥорон таһаардыбыт.
Түмүккэ, оҕо айар дьоҕурун сайыннарар, Гаврил Иванович Егоров-Биилин олоҕун, айар үлэтин туһунан билиини кэҥэтэр сыаллаах 9-11кылаас үөрэнээччилэригэр ыытыллыбыт «Биилин уонна билиҥҥи кэм» тиэмэҕэ өйтөн суруйуу күрэс кыайыылаахтарын билиһиннэрэбит:
Хайҕал сурук I үрдэлэ – Лев Седалищев, 9 кылаас үөрэнээччитэ;
Хайҕал сурук II үрдэлэ – Айыына Абрамова, 10 кылаас үөрэнээччитэ;
Хайҕал сурук III үрдэлэ – Эрэл Потапов, 11 кылаас үөрэнээччитэ.
Биир дойдулаахпыт, 30-с сылларга поэзияҕа киэҥник хардыылаан киирэн испит, саха биир бастакы көлүөнэ суруйааччыта, репрессияҕэ түбэһэн уустук олоҕу олорбут, үтүө аата сүүрбэ сыл буолан баран төннөрүллүбүт, учуутал, бэйиэт, Гаврил Иванович Егоров-Биилин, төрөөбүтэ 115 сылыгар аналлаах бэлиэ күнүнэн Одьулуун оскуолата үгүс үбүлүөйдээх сылы үрдүк таһымҥа түмүктүүр.
педагог-бибилэтиэкэр Туйара Максимова
