Уроки по Joomla 3 можно найти здесь: http://joomla3x.ru/
Четверг, 24 мая 2018 16:49

Тиһэх чуораан чугдаарар!

Автор 

 Бары үөрэнээччилэр, оҕо саас кэрэ кэмнэринэн арыалланан кылаастарын түмүктээн, инникигэ хардыылыыр дьоһуннаах күннэринэн, билиини-көрүүнү ылан кынат анньынар оскуоланы бүтэрээччилэргэ, оскуола коллективтарыгар  уонна төрөппүттэрбитигэр Чурапчы улууһун үөрэҕин салалтатын аатыттан истиҥ эҕэрдэбитин тиэрдэбит!

    Оскуолатааҕы сыллар – киһи үйэтин-сааһын тухары умнубат, сырдык өйдөбүлү саҕар кэрэ кэм. Киһи буолуу, саха буолуу барыта манна төрүттэнэр, төрөөбүт дойдуга, Ийэ Сиргэ, бар дьоҥҥо таптал манна саҕыллар, дьоһун дьон буолан кэрэ олоҕу олорор баҕа санаа манна иитиллэр. Быйылгы үөрэх дьылыгар улууспут үрдүнэн 27 оскуолаҕа 3343 оҕо үөрэннэ. 9 кылааһы 293 оҕо, 11 кылааһы 239 оҕо түмүктээн ОГЭ, ЕГЭ туттарыаҕа. 45 выпускник мэтээлгэ үлэлиир.

   Үөрэх хаамыыта бары оскуолаларга Федеральнай Государственнай үөрэх стандартарыгар сөп түбэһиннэрэн ыытыллар. Оскуолаларбыт таһаарыылаах үлэлэрин туоһутунан Хатылы, Төлөй, Бахсы, С.А. Новгородов аатынан Чурапчы орто оскуолалара республика бастыҥ оскуолаларын ахсааннарыгар киирэн Граннары ылары ситиспиттэрэ буолар. Үгэскэ кубулуйбут академик Ларионов аатынан „Инникигэ хардыы“ эдэр чинчийээччилэр 22-с өрөспүүбүлүкэтээҕи научнай практическай конференцияларыгар 52 оҕо кыттан Чурапчы улууһун хамаандатын 2-с миэстэҕэ таһаардылар. 4 о5о лауреат, 13 оҕо дипломант аатын ыллылар. 37 дакылааттан 21-рэ Бүтүн Россиятааҕы түһүмэххэ мэктиэлэммиттэрэ. Олор истэриттэн Москва, Казань, Ярославль,Королев, Вологда куораттарга республика чиэһин көмүскээн 4 оҕо лауреат – Чакыр орто оскуолатыттан Сайаана Попова (сал. А.Н. Софронова),Чурапчы гимназиятыттан Кристина Данилова (сал. К.М. Екечьямова), С.А. Новгородов аатынан Чурапчы оскуолатыттан Дайаана Попова (сал. А.И. Флегонтова), Никита Григорьев (сал. И.В. Сивцев); 4 оҕо дипломант – Чурапчы гимназиятыттан Маша Сидорова (сал. Ф.Н. Болдовская, И.С. Соловьева), , Андрей Монастырев (сал. Пермякова Е.А.), Далан Заболоцкай (сал. М.И. Хоютанова), И.М.Павлов аатынан Чурапчы оскуолатыттан Анжелика Кривошапкина (сал. А.И. Варламова) уонна Чурапчы гимназиятыттан Сергей Коркин (сал. В.Р. Скрябин) «За практическую значимость» грамота ылары ситистэ. Саха сиригэр ыытыллар Аан дойдутааҕы интеллектуальнай оонньууларга 6 оҕо путевка ылбыттара.

       Бүтүн Россиятааҕы үөрэнээччилэр олимпиадаларын оскуолатааҕы түһүмэҕэр 1484, улуустааҕы түһүмэҕэр 688 оҕо кытынна. Республикатааҕы түһүмэххэ 14 предметынан 48 оҕо кыттан, 9 оҕо бириистээх миэстэҕэ тиксибитэ. Россиятааҕы түһүмэххэ, С.К.Макаров аатынан Чурапчы гимназиятын 11 кылааһын үөрэнээччилэрэ Мишкин Николай география предметыгар уонна Назаров Александр физкультура предметыгар Саха Республикатын чиэһин көмүскээн кэллиллэр. Бу түһүмэх финалыгар киирэн Мишкин Николай Россия призерун үрдүк аатын ылары ситистэ. Биир чаҕылхай ситиһиинэн, Ульяновскай уобаласка сылын аайы ыытыллар Бүтүн Россиятааҕы «Ученик года» күрэххэ, СӨ чиэһин көмүскээн Чурапчы гимназиятын үөрэнээччитэ Никита Григорьев лауреатынан буолла.

     Чурапчыбытыгар 2018 сыл «Оҕо уонна ыччат дьоҕурун сайыннарыы» сылынан биллэрилиннэ. Оҕо бары өттүнэн сайдыылаах буоларыгар туһуламмыт араас тэрээһиннэр, олимпиадалар, күрэхтэһиилэр, конференциялар былааннаахтык ыытыллаллар. Эбии үөрэхтээһининэн 95% оҕо хабылынна. Идэҕэ туһаайар «Ситис», «Мындыр» бырайыактар үлэлээннэр улуус оҕолоро араас идэҕэ бэйэлэрин холонон көрдүлэр. Чурапчы техническэй колледжыгар, Одьулуун аграрнай техникумугар оҕолор идэни боруобалаатылар.

     Киһи-аймах сайдыытыгар эркээйи охсон олук уурар, дьонунан сир үрдүгэр биир саамай бочуоттанар идэлээх учууталлар буолаллар. Кинилэр биэрэр киэҥ билиилэринэн, кыһамньыларынан үгүс көлүөнэ-дьон үүнэн-сайдан тахсаллар. Ол курдук быйылгы үөрэх дьылыгар Төлөй орто оскуолатыттан М.И. Аммосова өрөспүүбүлүкэтээҕи «Сыл бастыҥ педагог-библиотекара» куонкуруска «Инновации в библиотечном деле» анал ааты ылла, «Сыл учуутала» өрөспүүбүлүкэтээҕи куонкуруска И.М. Павлов аатынан Чурапчы орто оскуолатын историяҕа учуутала В.В. Макаров «Эдэр учууталлар» куонкурстарыттан тирэх ылан ситиһиилээхтик кытынна, «Үөрүү» оҕо сайдар киинин эбии үөрэхтээһинин педагога П.П. Хоютанов идэ маастарыстыбатын күрэҕин дипломана буолла.

   Күндү оскуоланы бүтэрэр выпускниктарбыт! Инникигэ эрэллээх, үрдүк култууралаах дьон буолуҥ, ханна да сырыттаргыт үөрэммит, ииппит оскуолаҕытын, учууталларгытын умнумаҥ. Биир кэлим экзаменнаргытын ситиһиилээхтик туттаран, сөбүлүүр, табыллыам дии санаабыт үөрэххитигэр киирэргитигэр, талан ылбыт идэҕитигэр бэриниилээхтик үөрэнэн, үчүгэй үлэһит буолан тахсын, дойдугут Чурапчы аатын чугдаарыта дуоратыҥ. Эһиги иннигитигэр Аан Ийэ дойду арыллан турар, айыҥ-тутуҥ, тус бэйэҕит саҥа дьикти кэрэхсэбиллээх суолгутун тэлэн, куруук инниҥ диэки хардыылаан иһин!

Прочитано 427 раз Последнее изменение Пятница, 25 мая 2018 11:23