Уроки по Joomla 3 можно найти здесь: http://joomla3x.ru/
Пятница, 28 сентября 2018 15:12

Саха Өрөспүүбүлүкэтин Судаарыстыбаннаһын күнэ!!!

Автор 

  1990 сыл балаҕан ыйын 27 күнүгэр биһиги өрөспүүбүлүкэбитигэр судаарыстыбаннай суверенитет туһунан Декларация ылыныллыбыта. Декларация өрөспүүбүлүкэбит Россия Федерациятын тэҥ бырааптаах субъега буоларын биллэрбитэ. Саха сирэ бэйэтин социальнай-экономическай сайдыытын, нэһилиэнньэ олоҕун-дьаһаҕын тупсарыы сүрүн хайысхаларын быһаарынар кыахтаммыта. Бу дьаһал олоххо киириитэ биһиги саха норуотугар улахан, дириҥ суолталаах. Маныаха, өйдөрүн -санааларын уурбут, саха норуот туһугар үлэлээбит-хамнаабыт киэн туттар дьоммут, Алексей Кулаковский, Платон Ойуунускай, Максим Аммосов, Исидор Барахов, Степан Аржаков, Василий Никифоров-Күлүмнүүр ааттара үйэлэргэ умнуллубат. Онтон быйыл биһиэхэ Чурапчы улууһун олохтоохторугар ураты суолталаах бырааһынньык буолла. Биһиги бары ытыктыыр, киэн туттар киһибит, бөдөҥ политическай деятель, Саха АССР норуотун комиссардарын сэбиэтин председателэ И.Н. Винокуров аата тилиннэ, ол курдук, И.Н. Винокуров бюста үөрүүлээх быһыыга-майгыга арылынна. Быйыл сайын, төрөөбүт нэһилиэгэр Арыылаахха, Иван Николаевич төрөөбүтэ 125 сылыгар анаан ыһыах тэриллибитэ. Чурапчыттан делегация Москва куоракка тиийэн, уҥуоҕар сибэкки дьөрбөтүн, төрөөбүт сирин Арыылаах буорун илдьэн уурбуттара.

IMG 1756
   Судаарыстыбаннас күнэ улууспут оскуолаларыгар бу күн киэҥ далааһыннаахтык бэлиэтэнэр. Үөрүүлээх линейка, кылаас чааһа, квест оонньуу, араас викторина, оскуолаҕа оҕо хамсааһыныгар сүрэхтэнии, радиорубканан эҕэрдэ, уо.д.а. араас тэрээһиннэр ыытыллаллар, сорох оскуолаҕа бү күн сахалыы таҥас кэтэллэр. Ыытыллыбыт ыйытынньык түмүгүнэн көрдөххө, хас оскуола ахсын саха сирин былааҕа, гиэрбэтэ баар, гимн тиэкиһэ истиэнэҕэ ыйанан турар. “Музыка для всех” республиканскай программанан Саха Сирин гимнин оскуола оҕото барыта үөрэтэр,билэр, ыллыыр. Оҕону төрөөбүт дойдуну таптыырга, дьонунан-сэргэтинэн киэн туттарга иитэр үлэ ыытыллар. Онон, Саха Сирэ киэн туттар ыччаттарын, сайдар суолун арыйан сырдыкка, сайдыыга сирдиир оҕолору иитэн таһаарыахпыт диэн эрэнэбит! Үүнэ-сайда, чэчирии тур, тапталлаах Сахабыт Сирэ!!!

Прочитано 26 раз Последнее изменение Понедельник, 01 октября 2018 09:23