Уроки по Joomla 3 можно найти здесь: http://joomla3x.ru/
Вторник, 16 октября 2018 11:51

Кэрэ ситим, кэрэ көстүү, кэрэ эйгэ, кэрэ кэрэни үөскэтэр, кэрэттэн кэрэ салҕанар! «Үс ситим-үс кэрэ!» дьиэ-кэргэн фестиваля

Автор 

   Алтынньы ый 12 күнүгэр Аан дойдутааҕы аҕам саастаах дьон, Аан дойдутааҕы кыыс, Саха сирин ийэлэрин күнүгэр аналлаах «Үс ситим-үс кэрэ!» фестиваль буолан ааста. Фестивалы Чурапчытааҕы үөрэх управленията уонна Бүтүн Россиятааҕы “Россия ийэлэрэ” общественнай хамсааһын Чурапчытааҕы салаата тэрийдилэр. Тэрээһин сыала-кыыс оҕо ууһу ууһатааччы, алаһа дьиэ араҥаччыта буоларын өйдөтүү, кэрэни кэрэхсииргэ, үчүгэйи үксэтэргэ уһуйуу, ийэ,эбэ, кыыс истиҥ сыһыаннарын, сатабылларын көрдөрөн, ол холобурунан иитии.
   IMG 2453Маннык көрүҥ фестиваль бастакытын ыытылынна. Тэрээһин уратыта диэн үс кэрэ ситимин көрдөрөн, эбэ, ийэ, кыыс хамаанда тэринэн кыттыыны ылыылара буолар. Барыта 6 хамаанда, 5 оскуолаттан кытынна. Бары да ох курдук оҥостон, сир курдук симэнэн, олус бэркэ тэриммиттэр. Этаптара судургу буолан кыттааччылар астыннылар. 1 этап- бэйэни билиһиннэрии, 2 этап- “Candy bar” остуолун талбыт теманан киэргэтии. Бу этапка араас минньигэс, өҥүнэн-дьүһүнүнэн дьүөрэлии остуоллары тартылар. 3 этап-«Бабушкин сундук»-эбэлэр 60-70-80 сыллардааҕы моданан таҥнан –киэргэнэн киириилэрэ, бу этапка эбэлэрбит эдэр кэминээҕи кэмнэрин санаан-ахтан, сэргэхсийэн ыллылар. Эбэлэрбит сыанаҕа туттан-хаптан, киэргэнэн дьахтар киһи хас баҕар сааһыгар кэрэтин бигэргэттилэр. 4 этап - «Творю красоту своими руками»-кыргыттар илиинэн оҥоһукка маастар- кылаас көрдөрдүлэр. Манна сааһа арааһын да үрдүнэн, бары тарбахтарыгар талааннаахтарынан сөхтөрдүлэр. Холобур, саамай кыра кыттааччыбыт, И.М. Павлов аатынан Чурапчы орто оскуолатын 1 кылааһын үөрэнээччитэ Каролина Собакина улахан кыттааччылары кытары тэбис тэҥҥэ ожерелье оҥорон көрдөрдө. С.К. Макаров аатынан гимназия үөрэнээччитэ, Катя Слепцова араас эгэлгэ бэйэтин оҥоһуктарын аҕалбыт, оҕуруоттан саҕалаан, сымыыт хордуонунан кубаны хайдах оҥорбутун кэпсээтэ. Кыргыттар бары бэриллибит бириэмэҕэ сып-сап туттан, оҥоро үөрүйэх буолан, оҥоһуктарын бүтэрэн көмүскээтилэр.
   Түмүк: муҥутуур кыайыылаах, “Үс ситим-үс кэрэ!” анал аат - Абрамова Мотрена Дмитриевна, Винокурова Варвара Илларионовна, Яна(Одьулуун орто оскуолата);
“Талба талаан ситимэ”- Собакина Клара Васильевна,Петрова Валентина Николаевна, Айгюн (И.Е. Федосеев аатынан Дириҥ-агро орто оскуолата)
“Истиҥ сыһыан ситимэ” - Наумова Татьяна Лукинична, Бехтюева Светлана Семеновна, Алиса, Алевтина, Света, Амилина(С.А.Новгородов аатынан Чурапчы орто оскуолата)
“Кэрэ ситимэ” - Попова Наталья Афанасьевна,Слепцова Антонина Николаевна, Катя(С.К. Макаров аатынан Чурапчы гимназията)
“Иэйии ситимэ” - Васильева Мария Михайловна, Собакина Анастасия Васильевна, Каролина (И.М. Павлов аатынан Чурапчы орто оскуолата)
“Уран ситимэ” - Захарова Анисия Софроновна, Захарова Любовь Владимировна,Наташа (С.А.Новгородов аатынан Чурапчы орто оскуолата).
Бары дьиэ кэргэттэри бэлэмнэспит, өйөөбүт, күүс-көмө буолбут оскуолаларбытыгар махталбытын тиэрдэбит! Кытааччыларбытыгар баҕарабыт өрүү маннык кэрэҕит ситимэ көлүөнэттэн көлүөнэҕэ бэриллэн салҕана турдун, эһигини кэрэ, үтүө, истиҥ иэйии, сылаас сыһыан угуттаатын!!!

Прочитано 48 раз