Понедельник, 16 ноября 2020 11:46

Коркин Василий Николаевич

Автор

Саха Өрөспүүбүлүкэтин үтүөлээх учуутала, РСФСР норуотун үөрэҕириитин туйгуна, Н.К. Крупская аатынан бириэмийэ лауреата, Чурапчы уонна Кытаанах нэһилиэгин бочуоттаах олохтооҕо

Василий Николаевич Кытаанах нэһилиэгэр биэс оҕолоох Анна Гаврильевна уонна Николай Васильевич Коркиннар дьиэ кэргэннэригэр төрдүс оҕонон төрөөбүтэ.

1972–1975 сс. Намнааҕы педагогическай училище уруһуй, черчение салаатыгар үөрэммитэ. Педагог үлэтин Д.П. Коркин аатынан Чурапчы өрөспүүбүлүкэтээҕи успуорт оскуола-интернатыгар уруһуй уонна черчение учууталынан саҕалаабыта. Кэлин Хабаровскайдааҕы педагогическай үнүстүүт художественнай-графическай факультетын бүтэрбитэ.

156

1984 с. Кытаанах орто оскуолатыгар дириэктэринэн анаммыта. Кэллэктииби түмэн, бэйэтин үтүө холобурунан оскуола материальнай-техническэй базатын тупсарыыга ылсан үлэлээбитэ. Кабинеттар саҥардыллан өрөспүүбүлүкэҕэ бастыҥынан ааттаммыттара. Василий Николаевич салайар кэмигэр оскуола саҥа таһымҥа тахсан, 1990 сылтан хайысхалаах үөрэҕи киллэрэн өрөспүүбүлүкэҕэ бастыҥ үлэлээҕинэн киэҥник биллибитэ. Художественнай-эстетическэй хайысханан улууска бастакынан, онтон өрөспүүбүлүкэҕэ, экспериментальнай площадка буолбута. Атын оройуоннартан, Арассыыйаттан кытта кэлэн уопут атастастаһан барбыттара. Намнааҕы педагогическай училище тирэх оскуолатынан буолбута.

Салайааччы каадырдары үөрэтиигэ, үүннэриигэ болҕомтотун уурбутун түмүгэр Кытаанах оскуолатыгар үлэлээбит үгүс эдэр педагогтар Саха сирин уонна улуус үөрэҕин тэрилтэлэрин салайааччылара буолбуттара. 1993 с. В.Н. Коркин үлэтин уопутун билсиһэр сыаллаах дириэктэрдэр, үөрэх салалтатын начальниктарын регионнааҕы семинара ыытыллыбыта.

21

1995 с. Чурапчы орто оскуолатын дириэктэринэн анаммыта. Оскуола материальнай-техническэй базата хаҥатыллыбыта, мастарыскыай тупсарыллыбыта, оскуоланы ититиигэ, күрүөлээһиҥҥэ, көҕөрдүүгэ кэллэктиип үгүс үлэни көрсүбүтэ, олорор дьиэлэри, квартиралары үлэҕэ киллэртэрбитэ. Оскуола 125 сыллаах үбүлүөйэ киэҥник бэлиэтэммитэ. Национальнай кэнсиэпсийэни олоххо киллэрии үгэннээн турар кэмигэр үс этээстээх оскуола ис көстүүтэ сахалыы тыыннанан, «Кыыс Куо», «Үрүҥ Уолан» биридимиэттэригэр анал балаҕан, ураһа тутуллубута. 1995–2002 сс. оскуола иитэр-үөрэтэр үлэтигэр, идэ маастарыстыбатын үрдэтиигэ үтүө түмүктэри ситиспитэ.

Бары өттүнэн сайдыылаах киһини иитэн таһаарыыны үөрэх кыһата сыал-сорук оҥостон үлэлээбитэ. 1996 сылтан оскуола «Школа–система профессиональной ориентации выпускников улусного центра» эксперимент үлэтин ыыппыта. 10-11 кылаастарга физико-математическай, гуманитарнай, естественнэй, эстетическэй хайысхаларынан үөрэтии киирбитэ. Оҕо дьоҕура сайдар эйгэтин үөскэтэн араас куруһуоктар, секциялар тэриллэн үлэлээбиттэрэ. Эдэр чинчийээччилэр «Инникигэ хардыы», «Экология» НПК-лар, «Аман өс», «Эдэр суруналыыс» өрөспүүбүлүкэтээҕи куонкурустарга, Башарин ааҕыыларыгар, олимпиадаларга ситиһиилэммиттэрэ.

Р.Р. Саввин салайар «Күөрэгэй» Оҕо ырыа ансаамбыла образцовай кэллэктиип аатын ылбыта. Оҕо доруобуйатыгар болҕомто ууруллан, стоматологическай кабинет 1996 с. тэриллибитэ. 2000 сылтан оскуолаҕа Оҕо спортивнай оскуолатын дьарыктара ыытылланнар, бары успуорт көрүҥэр элбэх чөмпүйүөннэр, призердар үүммүттэрэ.

Василий Николаевич салайар кэмигэр улахан кэллэктиипкэ элбэх учуутал, үлэһит наҕараадаламмыта, бириэмийэлэммитэ. Салайааччы сонун хайысхалары булан үлэҕэ киэҥник туһаммыта, дириэктэрдэр, черчение учууталларын семинардарыгар, куурустарыгар идэтин таһымын үрдэтиммитэ. «Оскуола–нэһилиэк духуобунаһын киинэ» Илин эҥээрдээҕи научнай-практическай кэмпириэнсийэҕэ, регионнааҕы дириэктэрдэр семинардарыгар кыттыбыта.

2002 с. алтынньы ыйыттан «Арчы» үөрэтэр киин дириэктэринэн үлэлээбитэ. 11 көрүҥ оҥорон таһаарар идэлэргэ үлэтэ суох дьону үөрэтэр кылгас кэмнээх үөрэх ыытыллара.

45

Василий Николаевич 2008 сылтан Чурапчы улууһун үөрэҕин салалтатын начальнигынан ананан араас хайысхалаах, киэҥ өрүттээх үлэҕэ, үөрэх тэрилтэлэригэр саҥаны киллэриигэ, эксперимеҥҥэ үлэҕэ бары сатабылын уурбута. Үөрэх салалтатын, Чурапчы нэһилиэгин «Чуораанчык» уһуйаанын саҥа дьиэлэрэ үлэҕэ киирбиттэрэ. Федеральнай судаарыстыбаннай үөрэх стандартын киллэрии саҕаланан улуус уон оскуолата пилотнай буолбуттара. 2010 с. «Учуутал сыла» киэҥ тэрээһиннээхтик ыытыллыбыта. 2011–2015 сс. «Наша новая школа» национальнай үөрэх инициативатын олоххо киллэриигэ былаан оҥоһуллубута.

41

Учууталлаан, бэйэтин дьоҕурунан, талаанынан суол-иис хаалларан, үөрэнэргэ, үлэлииргэ, сайдарга бары усулуобуйаны тэрийэн, Чурапчы улууһун үөрэхтээһинэ сайдыытыгар, эдэр көлүөнэ ыччаты иитиигэ-үөрэтиигэ салайааччы улахан кылааты киллэрбитэ. Үлэҕэ дьулуурунан, тэтиминэн уопсастыбаннай олоххо көхтөөхтүк кыттыбыта. Кытаанах нэһилиэгиттэн Улуус мунньаҕын депутатынан талыллан аҕыс сыл үлэлээбитэ, баһыйар куолаһы ылан мунньах бэрэссэдээтэлин солбуйааччынан талыллыбыта, үгүс үлэни ыыппыта. Атах оонньуутун федерациятын салайбыта. С.А. Новгородов аатынан Чурапчы уонна В.С. Яковлев-Далан аатынан Кытаанах орто оскуолаларын бочуоттаах бэтэрээнэ.

Василий Николаевич улахан дьиэ кэргэн аҕа баһылыга, кэргэнинээн, РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна Лилия Захаровналыын икки уолларын үөрэхтээн, ыал оҥортоон бочуоттаах сынньалаҥҥа олороллор.

Прочитано 622 раз Последнее изменение Пятница, 26 марта 2021 14:37