Спидкубинг успуорт ураты көрүҥүн быһыытынан биллэр, киһи илиитин, тарбахтарын былчыҥнарын, толкуйдуур дьоҕурун сайыннарар буолан дьон-сэргэ кэрэхсээн дьарыктанар. Онон чөмпүйэнээккэ улуус араас оскуолаларыттан 60 оҕо кэлэн кытынна. Күрэхтэһии Аан дойдутааҕы кубик ассоциациятын (WCA) быраабылаларынан ыытылынна. Кубер оҕолор араас быһылаах кубик Рубиктары бириэмэҕэ хомуйдулар. Хамаанданан уонна биирдиилээн бастыыр иһин күрэхтэстилэр. Саамай кылгас бириэмэҕэ хомуйбут кубердар бастыҥнарынан ааттаннылар, грамоталарынан, сыаналаах бириистэринэн наҕараадаланнылар. Хамаанданан күрэххэ Степан Макаров аатынан Чурапчы гимназиятын 1-кы хомуур хамаандата 1 миэстэ буолары ситистэ (сал. К.М. Екечьямова), 2 миэстэҕэ Семен Новгородов аатынан Чурапчы орто оскуолатын кырачаан кубердара (1-4 кылаастар) тахсан кыайыы өрөгөйүн биллилэр (сал. А.Н. Коркина), Степан Макаров аатынан Чурапчы гимназиятын 2 хамаандата бочуоттаах 3 миэстэ буолла (сал. К.М. Екечьямова). Бастыҥ көрдөрүүлээх оҕолор: Аман Сивцев, Семен Новгородов аатынан Чурапчы орто оскуолата (1-4 кыл.), Дьулус Феофанов, Степан Макаров аатынан Чурапчы гимназията (5-9 кыл.), Дьулурхан Дьоллоохов, Степан Макаров аатынан Чурапчы гимназията (10-11 кыл.) «Орто Дойду» экопаарка анал бирииһинэн наҕараадаланнылар.