П. А. Ойуунускай аатынан Государственность түмэлэ, «Таатта» литературнай түмэл, Тааттатааҕы кыраайы үөрэтэр түмэл, Тааттатааҕы библиотекалар, А. Е. Мординов аатынан Тааттатааҕы лицей тэрийэн ыыппыт Саха Өрөспүүбүлүкэтэ тэриллибитэ 100 сылыгар аналлаах «Илин эҥэрдээҕи эдэр кыраайы үөрэтээччилэр ааҕыылара» Таатта улууһун Чөркөөх нэһилиэгэр П.А.Ойуунускай аатынан Государственность түмэлигэр муус устар 27 күнүгэр буолла.

Сыала-соруга: өрөспүүбүлүкэ төрүттэниитигэр, сайдыытыгар сабыдыаллаабыт личностары, событиелары үөрэтиигэ, чинчийиигэ анаммыт ааҕыылар түмүктүүр түһүмэхтэрин тэрийии, саҥа көлүөнэ ыччатыгар таһаарыы, түмэли билиһиннэрии, билиини кэҥэтии.

​ ​               

                Ааҕыылары үөрүүлээхтик арыйыыга түмэл дириэктэрэ Геннадий Аржаков, Тааттатааҕы лицей дириэктэрэ Изабелла Сивцева, Чурапчы түмэлин дириэктэрэ Михаил Дьячковскай эҕэрдэ тылларын эдэр чинчийээччилэргэ анаатылар. Дэбдиргэ оскуолатын дириэктэрэ Иннокентий Дягилев саҥа тахсабыт Бояров туһунан кинигэни бэлэх уунна. Музей үлэһитэ Марианна Барахова оҕолорго анаан олус интэриэһинэй экскурсия ыытта.

​                Уопсайа түөрт секция үлэлээтэ. «Период установления Советской власти» секцияҕа Чурапчы улууһун Т. М. Каженкин аатынан Арыылаах орто оскуолатын 10 кылааһын үөрэнээччитэ Барашков Коля, биир дойдулаахпыт Иван Николаевич Винокуров туһунан «Забытый нарком ЯАССР» үлэнэн кыттан 3 миэстэ ылары ситистэ. Салайааччыта история уонна обществознание учуутала Федот Алексеевич Винокуров. Боотуруускай улуус Арыылаах нэһилиэгиттэн төрүттээх бөдөҥ судаарыстыбаннай уонна политическай деятель туһунан үлэни хомуйан үөрэтэр, быйыл И.Н. Винокуров төрөөбүтэ 130 үбүлүөйдээх сылыгар оҕолор элбэх тэрээһиннэргэ, научнай-практическай конференцияларга ситиһилээхтик кытыннылар. Ситиһиилээхтик кыттыбыттарын иһин эҕэрдэбитин тиэрдэбит.