Тиһэх чуораан чугдаарар!
Бу күн, киэҥ нэлэмэн дойдубут үрдүнэн долгутуулаах тиһэх чуораан чугдаарар. Оҕо саас кэрэ кэмнэринэн арыалланан кылаастарын түмүктээн, инникигэ хардыылыыр бары үөрэнээччилэргэ, билиини-көрүүнү ылан кынат анньынар оскуоланы бүтэрэр выпускниктарга, оскуола коллективтарыгар уонна төрөппүттэргэ Чурапчы улууһун үөрэҕин салалтатын аатыттан истиҥ эҕэрдэбитин тиэрдэбит!
Улууспут үрдүнэн 21 оскуолаҕа 3522 оҕо үөрэх дьылын түмүктүөҕэ, 9 кылааһы 260, 11 кылааһы 221 оҕо бүтэриэҕэ.
Быйылгы үөрэх дьылыгар Федеральнай Государственнай үөрэх стандартара саҥардыллан эһиил маҥнайгы уонна 5-һис кылаастарга киирэллэригэр бэлэмнэнии үлэлэр бардылар. Төрөөбүт тылы үөрэтиигэ, оҕо дьоҕурун сайыннарыыга, патриотическай иитиигэ болҕомто уурулунна. Саха АССР төрүттэммитэ 100 сылынан, Саха өрөспүүбүлүкэтигэр Ийэ, Чурапчы улууһугар Ийэ сир сыла уонна үөрэхтээһин эйгэтигэр «Ааҕыы сыла» биллэриллэн элбэх араас тэрээһиннэр ыытылыннылар. Чулуу дьоммут Семен Андреевич Новгородов, Семен Степанович Яковлев-Эрилик Эристиин төрөөбүттэрэ 130, профессор Георгий Прокопьевич Башарин төрөөбүтэ 110 сылын киэҥник бэлиэтээтибит. Дириҥ орто оскуолата 100, Амма, Хатылы, Мугудай оскуолалара 90, Улахан-Күөл интерната, Сылаҥ алын медицинскэй академията 20, Хатылы «Ньургуһун» уһуйаана 60, «Улыбка» уһуйаана 55 сыллаах юбилейдарын элбэх ситиһиилээх көрүстүлэр.
Оскуола сырдык, саҥа дьиэлэрэ нэһилиэк сайдыытыгар, үөрэх хаачыстыбата тупсарыгар саҥа кыахтары үөскэтэллэр. Быйыл тыа сирин өйүүр программа нөҥүө Кытаанах оскуолатын саҥа таас дьиэтэ үлэҕэ киирдэ, Хайахсыт, Амма оскуолалара тутулла тураллар. Аныгы кэм ирдэбилинэн С.К.Макаров аатынан Чурапчы гимназиятыгар, С.А. Новгородов аатынан Чурапчы орто оскуолатыгар, Телей, Кытаанах уонна Одьулуун орто оскуолаларыгар «Цифровой үөрэх эйгэтэ» тэриллэн, түргэн интернеккэ холбоммут, цифровой техниканан хааччыллыбыт анал кабинеттар арылыннылар. «Үөрэхтээһин» национальнай бырайыак чэрчитинэн Хадаар, Алаҕар, Соловьев оскуолаларыгар естественно-научнай уонна технологическай хайысхалаах «Точка роста» кииннэр арыллан улэлэрин саҕалаатылар. «Үөрүү» Оҕо дьоҕурун сайыннарар киин иһинэн «Норд IT» IT-үөрэхтээһин киинэ арылынна.
Оҕо дьоҕурун сайыннарар сыаллаах араас тэрээһиннэр, олимпиадалар, күрэхтэһиилэр, конференциялар улуус оҕолорун түмэ тардан, тиһигин быспакка ыытыллан кэллилэр. Бу барыта инники кэскилбит, кэнчээри ыччаппыт сайдарыгар, дьоһун дьон буолан тахсарыгар, Чурапчы кэскилэ түстэнэригэр анаммыт үлэ. «Тыл-омук тыына» республикатааҕы форум 600 киһини хабан 3-с төгүлүн ыытылынна. Үөрэх үлэһиттэрэ муус устарга ыытыллыбыт биэс улуус кыттыылаах «Гражданскай өрөбүллэр» форумҥа кыттыыны ылан, ордук «Үөрэнээччи XXI үйэ үөрэхтээһинин эйгэтигэр» былаһааккаҕа сытыытык турар тэйиччиттэн үөрэх, идэҕэ туһаайыы уонна төрөөбүт тылы үөрэтии кыһалҕаларын тула аһаҕастык кэпсэппиттэрэ.
Оскуолаларбыт таһаарыылаах үлэлэрин туоһутунан оҕолорбут ситиһиилэрэ буолар. Үгэскэ кубулуйбут академик Ларионов аатынан „Инникигэ хардыы“ эдэр чинчийээччилэр өрөспүүбүлүкэтээҕи научнай-практическай конференциятыгар Чурапчы улууһун хамаандата 2-с миэстэҕэ таҕыста. Барыта 78 оҕо кыттыбытыттан 2 оҕо лауреат, 42 оҕо дипломант аатын ыллылар: 1 ст. диплом- 7, 2 ст. диплом – 18, 3 ст. диплом – 17. Россиятааҕы үөрэнээччилэр олимпиадаларын оскуолатааҕы уонна улуустааҕы түһүмэҕэр 21 оскуолаттан 2044 оҕо кыттыбыта, онтон регионнааҕы түһүмэххэ (ВсОШ, ОШ РС(Я)) 67 оҕо кыттан 2 оҕо кыайыылааҕынан, 13 оҕо призерунан таҕыста. СӨ үөрэннээччилэрин олимпиадатыгар 2 үөрэнээччи кыайыылаах, 5 оҕо призердаатылар.
Киһи-аймах сайдыытыгар эркээйи охсон олук уурар, дьонунан сир үрдүгэр биир саамай бочуоттанар идэлээх учууталлар буолаллар. Кинилэр биэрэр киэҥ билиилэринэн, кыһамньыларынан үгүс көлүөнэ-дьон үүнэн-сайдан тахсаллар. Педагогтарбыт үрдүк таһымнарын Республикатааҕы куонкурустарга ситиһиилээхтик кыттан бигэргэттилэр:
- · «2022 сыл учуутала» – С.А. Новгородов аатынан Чурапчы орто оскуолатын учуутала Прасковья Дмитрьевна Максимова лауреат аатын ылла, СӨ үөрэхтээһинин туйгуна буолла.
- · «Серебряный пеликан» – Хатылы орто оскуолатын историяҕа уонна обществознаниеҕа учуутала Вероника Ивановна Спиридонова ХИФУ «Верность науке» анал аатын ылла.
- · «Сүрэхпин оҕолорго аныыбын» Россиятааҕы куонкурус Саха сиринээҕи түһүмэҕэр, Яковлева Лена Егоровна «Үөрүү» оҕо сайдар киинин Соловьев оскуолатыгар филиалын эбии үөрэхтээһинин педагога идэ маастарыстыбатын күрэҕин 3 ст. лауреата буолла.
- · «Кылаас салайааччыта-2022» күрэххэ Алевтина Николаевна Пономарева, Одьулуун ОО алын сүһүөх кылааһын учуутала «Перспективный классный руководитель » анал ааты ылла.
- · «Кэскил» уһуйаан уонна С.А. Новгородов аатынан Чурапчы ОО «JoinForces» холбоһуктаах хамаандата 1-кы республикатааҕы «Образовательный Хакатон 2.2» куонкуруска 2 миэстэни ылла.
- · Республикатааҕы информатика учууталларын методическай олимпиадаларыгар Чурапчы гимназиятын учуутала Захаров Прокопий Прокопьевич бастаата.
- · Программированиеҕа хамаанданан киирсии чемпионатыгар биһиги учууталларбыт 2 миэстэны ыллылар – Захаров П.П., гимназия, Гоголев Гаврил Иннокентьеич, Алаҕар ОО, Прокопьев Евгений Вячеславович, С.А. Новгородов аат. Чурапчы ОО.
Чурапчы нэһилиэгин «Березка» уһуйаана «Чурапчы улууһугар инбэлиит уонна доруобуйаларыгар хааччахтаах оҕолору өйүүр уонна сайыннарар ресурснай киин» бырайыагынан Россиятааҕы Владимир Потанин аһымал фондатын гранын ылла. Ону тэҥэ бу ресурснай киин уонна «Улыбка» уһуйаан, «Чурапчы кэскилэ» уопсастыбаннай тэрилтэ бырайыактара Ил Дархан гражданскай уопсастыба сайдыытыгар туһуламмыт гранын ыллылар (уопсайа 2 мөл 70 тыһ.).
Күндү оскуоланы бүтэрэр выпускниктарбыт!
Оскуола боруогун атыллаан олох киэҥ аартыгар үктэнэр үөрүүлээх уонна долгутуулаах күҥҥүтүнэн эҕэрдэлиибит, тургутууну ааһаҥҥыт сөбүлүүр идэҕитин талан үөрэнэн, үлэни өрө тутар дьон буолуоххут диэн эрэнэбит. Билиини биэрбит, бары үчүгэйгэ, үтүөҕэ ииппит үөрэххит кыһатыгар, учууталларгытыгар өрүү махталлаах буолуҥ, олоххо тутуһан бииргэ түмсүүлээхтик сылдьыҥ, үрдүк сыалгытын ситиһэн дойдугутун, дьоҥҥутун ааттатыҥ.
