Кулун тутар 22 күнүгэр Чурапчы улууһугар аан бастакытын IT-фестиваль ситиһиилээхтик ыытылынна. Фестиваль “Боотур Уус сыдьааннара” программаҕа уонна “Техностарт” проекка олоҕуран, тэтимнээхтик уларыйар үйэҕэ оҕо айан таһаарар дьоҕура, сатабыллара сайдарыгар туһаайылынна. Барыта 18 оскуолаттан 160-ча оҕо кыттыыны ылла.
Фестиваль үөрүүлээх аһыллыытыгар Чурапчы улууһун администрациятын аатыттан улуус кылаабынай архитектора Филиппов Валерий Васильевич эҕэрдэлээтэ. Кини «Муус устар» фестиваль тэрийээччилэрин ааттарыттан «Мин идэм - IТ» күрэххэ ситиһиилээхтик кыттыбыт хамаандаларга «Акселератор школьных проектов» лааҕырга путевка туттарда.
Чурапчы улууһун үөрэҕин салалтатын начальнига Посельскай Юрий Павлович цифровой технологиялар биһиги олохпутугар суолталара үрдүү турарын бэлиэтээн туран, оҕолорго информатиканы учугэйдик үөрэтэллэригэр, бу хайысханан араас круһуоктарга дьарыктанан билиилэрин үрдэтэллэригэр сүбэлээтэ. Уонна соторутааҕыта ыытыллыбыт программированияҕа өрөспүүбүлүкэ чемпионатын кыйыылаахтарын Степан Кузьмич Макаров аатынан Чурапчы гимназиятын 11 кылааһын үөрэнээччитэ Куличкин Тимуру, С.А.Новгородов аатынан Чурапчы орто оскуолатын үөрэнээччилэрин Сивцев Эркини, Александров Коляны эҕэрдэлээтэ. Кинилэр учууталларыгар Захаров Прокопий Прокопьевичка, Прокопьев Евгений Вячеславовичка махтал суруктары туттарда.
Фестиваль сүнньүнэн «Безопасность в сети интернет» диэн видеороликтар куонкурустарын «Үөрүү» оҕо дьоҕурун сайыннарар киин уонна Чурапчы полициятын отдела сүрүннээн ыыттылар. Конкурс түмүгүнэн дипломнары уонна подароктары Россия ис дьыалатын министиэрстибэтин Чурапчы улууһугар отделын начальнигын солбуйааччы, полиция подполковнига Тихонов Дьулустан Иннокентьевич туттарда. «Көлүкэчээн» оҕо үҥкүү ансаамбыла роботтар үнкүүлэринэн кыттааччылары эҕэрдэлээтэ.
Бу күн робототехникаҕа уонна квадрокоптердары салайыыга күрэхтэр буоллулар. Квадрокоптердары оҕолор анал трассанан көтүттүлэр, манна араас моһоллору сөпкө аһардан, төһө түргэнник финишка кэлбитэ учуоттанар. 15 оҕо кыттыбытыттан, кыайыылааҕынан Макаров Влад (Чурапчы гимназията) буолла, 2-с миэстэ Сивцев Дьулуур (Мугудай), 3-с миэстэ Иванов Арылхан (Арылаах) буоллулар.
Робототехника күрэҕэр үс араас көрүҥҥэ күрэхтэстилэр. Оҕолор бары роботтарын таҥан, программалаан аҕалбыттар. «Шорт-трек» категорияҕа 1 миэстэҕэ Одьулуун орто оскуолатын хамаандата, 2м Төлөй хамаандата, 3м Хаяхсыт хамаандата ыллылар. «Сумо» көрүҥэр роботтар күүстээх киирсиилэрэ буолла, манна элбэх кыттааччыттан Христофоров Костя (Арылаах) бастакы, Федоров Эрсан (Хадаар) иккис, Монастырев Эдик (Хаяхсыт) үһүс буоллулар. Кыраларга лего конструкторынан хомуйууга 1м- Захарова Милена (Арылах), 2м Макаров Марик (Сылан), 3м-Терютин Эрсан (Мугудай) буоллулар.
Мастер-кылаастарга уонна быыстапкаҕа үөрэх тэрилтэлэрэ уонна оҕолор IT хайысхаҕа бэйэлэрин үлэлэрин кэпсээтилэр. Ол курдук Г.П. Башарин аатынан Сылан орто оскуолата «Цифровая образовательная среда» проекка киирэн медкыласстарыгар дистанционнай үөрэхтээһини, агро хайысхаларыгар IT–технологиялары дьүөрэлээн үгүс саҥа инновационнай проектары киллэрбиттэрин кэпсээтилэр. Одьулуун орто оскуолата тыа хаһаайыстыбатыгар сыһыаннаах мобильнай приложение оҥорбуттарын билиһиннэрдилэр. «Улыбка» детсад «Мичээр» хамаандата өрөспүүбүлүкэ таһымнаах педхакатонна бастаабыт проектарын-«Суот» приложенияны билиһиннэрдэ. Быыстапка түмүгүнэн Одьулуун орто оскуолатын үөрэнээччитэ Седалищев Миша, С.А. Новгородов аатынан Чурапчы орто оскуолатын үөрэнээччитэ Данилов Коля, Сылан орто оскуолатын «Нейро-трек» маастар-кылааһа биһирэннилэр.
Фестиваль иһинэн «Аниграф» компьютернай графика конкурса ыытыллыбыта. Манна 12 оскуолаттан 40 тахса оҕо кыттыыны ылбыта. Оҕолор олус үчүгэй хартыыналары «Миру-мир» уонна «Земля наш общий дом-береги его» теманан оҥорбуттар. Бу күн кыайыылаахтарга дипломнар туттарылыннылар.
Элбэх кыттааччыны уонна көрөөччүнү аан бастакытын үөрэнээччилэр ортолоругар ыытыллыбыт Киберспортивнай турнир түмтэ. Бу турнир түмүгүнэн улуус сүүмэрдэммит хамаандата хомуллан үөрэнээччилэр өрөспүүбүлүкэтээҕи комплекснай спартакиадаларыгар кыттыыны ылыахтара. Киберспортивнай турнир финалыгар 12 хамаанда кыттыбытыттан 3 миэстэни Чакыр оскуолатын хамаандата уонна С.А. Новгородов аатынан Чурапчы орто оскуолатын “Скример” хамаандата ыллылар. Иккис миэстэҕэ С.К. Макаров аатынан Чурапчы гимназиятын хамаандата таҕыста, онтон кыайыылааҕынан С.А. Новгородов аатынан орто оскуола «Chykyryk» хамаандата буолла.
