Профессор Г.П.Башарин аатынан Сылаҥ орто оскуолатыгар, муус устар 15 күнүгэр, РСФСР үтүөлээх учуутала, педагогическай наука кандидата, РСФСР үөрэҕириитин туйгуна, К.Д.Ушинскай мэтээлин кавалера, СӨ учууталларын учуутала, СӨ айылҕа харыстабылын туйгуна, новатор, энтузиаст, маастар,методист учуутал, эколог, РФ суруналыыстарын сойууһун чилиэнэ Макаров Егор Дмитриевич аатын үйэтитиигэ анаммыт алын кылаас үөрэнээччилэригэр уонна уһуйаан иитиллээчилэригэр научнай-практическай конференция   ыытылынна.

“Үөкүйэ Дьөгүөр ааҕыылара” - оскуола үгэскэ кубулуйбут биир улахан тэрээһинэ быйыл бэһис төгүлүн ыытылынна. Егор Дмитриевич Макаров кэргэнэ Евдокия Тимофеевна, доруобуйа харыстабылын ветерана, сиэнэ Анна Степановна Яковлева, Мэдиссиинэ национальнай киинин сердечно-сосудистай отделын реабилитолог-терапевт бырааһа, үөрэнээччитэ Егор Иннокентьевич Макаров, “Сылаҥ нэһилиэгэ» МТ баһылыга, коллегалара Пермякова Е.И., Макарова К.Г. ыҥырыылаах ыалдьыттар буоллулар.

Барыта 91 оҕо Чурапчы улууһун уон икки оскуолатыттан, түөрт уһуйааныттан, Таатта улууһуттан, Дьокуускай куораттан кытынныллар. Экспердэринэн ветеран учууталлар үлэлээтилэр. Кинилэр оҕолор чинчийэр үлэлэрэ сайдыбытын, кэҥээбитин, кэпсииллэрэ, ыйытыыга эппиэттииллэрэ тупсубутун, оҕолор чобуоларын бэлиэтээтилэр. Ойуулук (мультипликационнай) киинэни, видеоролигы, оонньуулары оҥорууга IT технологияны туһаммыттарын сэргээтилэр.

“Үөкүйэ Дьөгүөр ааҕыылара” НПК  Лауреатын үрдүк аатын Дыгын Протодьяконов, 2 кылаас үөрэнээччитэ «Үөкүйэ Дьөгүөр-айылҕаны хоһуйааччы» диэн чинчийэр үлэтинэн ылла. Салайааччыта Друзьянова Варвара Васильевна.

Онон Сылаҥ орто оскуолатын коллектива  уонна  Егор Дмитриевич чугас дьоно  алын кылаас үөрэнээччилэрин, уһуйаан иитиллээчилэрин наукаҕа  бастакы хаардыыларын оҥорор  “Үөкүйэ Дьөгүөр ааҕыылара” научнай-практическай конференцияны    өссө сайыннарар, кэҥэтэр туһунан кэскиллээх кэпсэтиинэн бу тэрээһини түмүктээтилэр.

Сивцева Л.С. саха тылын литературатын учуутала.