Одьулуун оскуолата— Дойду президенин гранын кыайыылааҕа
Бу күннэргэ Россия президенэ Владимир Путин 2023 сыллааҕы гранын пуондатын кыайыылаахтара быһаарылыннылар. Өйөбүл уопсай суммата 3,5 млрд. солкуобай. Уопсайа 11 379 сайаапка киирбититтэн түмүккэ 1504 талыллыбыт, олор истэригэр Чурапчы улууһун Одьулуун орто оскуолатын 2 бырайыага кыайыылааҕынан ааттанна.
Одьулуун нэһилиэгин социальнай эйгэтин сайыннарар сыаллаах «ЭЙГЭ» диэн коммерческайа суох тэрилтэни 2022-2023 үөрэх дьылыттан орто оскуола сүрүннээн үлэлэтэр. Салайааччы – Ольга Георгиевна Кардашевская, Чурапчы улууһун "Олохтоох көҕүлээһиннэри өйүүр агентство" специалиһа. Оскуола директора Бекянов И.И. салалтатынан президент пуондатын граныгар 3 бырайыак кыттыыны ылла:
- «ПРИРОДНЫЙ ЛЕКАРЬ» - Софронова Е.Д., Карпова Л.С.
- «IT-ЛЕТО» - Кардашевская Н.А., Демешина Я.А., Пономарева А.Н., Матвеева Л. С.
- «ШКОЛЬНЫЙ КЛАСТЕР ТРУДА» - Заболоцкая Т.П., Аржакова А. Р., Карпов Р.Н., Посельская Д.В., Максимова Т.С.
Бу бырайыктартан «IT-ЛЕТО» уонна «Школьный кластер труда» кыайыылаах аатын сүктүлэр. Түмүккэ, «Социальное обслуживание, социальная поддержка и защита граждан» диэн хайысхаҕа «ШКОЛЬНЫЙ КЛАСТЕР ТРУДА» 1113467,00 солк. сууммалаах граны ылары ситистэ.
Санатан эттэххэ, 2014 с. сайыныгар Одьулуун нэһилиэгэ ууга баран элбэх хоромньу тахсыбыта. Күн бүгүн үгүс ыал булууһа, ону тэһэ оҕуруот аһын харайар анал сирэ суох олорор. Ол түмүгэр олохтоохтор сайынын бүөбэйдээн үүннэрбит хортуоппуйдара түргэнник буорту буолан элбэх күчүмэҕэйдэри көрсөллөр, сыллата сиэмэ хортуоппуйу атыылаһарга күһэллэллэр. Бу бырайыак чэрчитинэн нэһилиэккэ оҕуруот аһын харайар уонна үнүгэс үүннэрэр анал сирдэр, тыыннаах муннук тэриллиэхтэрэ. Оскуола үөрэнээччилэрэ чинчийэр үлэҕэ уһуйуллан, нэһилиэк олохтоохторо оҕуруот аһын уурдаран бары өттүнэн туһалаах бырайыак буолуо диэн эрэнэбит.
