Профессор Г. П. Башарин аатынан агрохайысхалаах Сылаҥ орто оскуолата 2020 сыллаахтан бэйэ тэлгэһэтигэр үүннэрэн уонна алаастан, тыаттан араас эмтээх оту, сэбирдэҕи хомуйан, от чэй оҥорор. Киһи доруобуйатыгар олус туһалаах, бэйэ төрөөбүт дойдутун минньигэс чэйин дьон-сэргэ сэргээтэ, сөбүлээтэ. Бу үлэ сыала - соруга оҕону доруобуйаны кыра эрдэхтэн көрүнэригэр үөрэтии уонна дьиэҥ тэлгэһэтиттэн, чугас тыаттан-хонууттан хомуйан, үгүс ороскуота суох, бородууксуйа оҥоруохха сөбүн үөрэтии, урбаан дьыалатыгар сыһыарыы. От чэйи оҥорууга кэллэктиип барыта кыттар. От ыйын бастакы күннэригэр хомуйабыт. Салгыы үлэ биригээдэтин уонна күнүскү лааҕыр оҕолоро ыраастыыллар, куурдаллар. Үөрэх сыла саҕаланнаҕына оҕолор от чэйи кыраһыабай хааларга куталлар, атыыга таһаараллар. Үлэни оҕолору үлэҕэ уһуйуу маастара, СӨ үөрэҕириитин туйгуна Баишева Сардаана Николаевна салайар. Үс сыл устата түөрт араас от чэйи оҥордубут, быыстапка-дьаарбаҥкаларга кытынныбыт, оҕолор чинчийэн, научнай-практическай конференцияларга ситиһиилээхтик дакылаат аахтылар. Онтон бу балаҕан ыйыгар СӨ тыатын хаһаайыстыбатын министиэристибэтэ тэрийбит өрөспүүбүлүкэтээҕи «За производство высококачественной продукции» конкурска кытынныбыт. Бородууксуйабыт өрөспүүбүлүкэтээҕи ас-үөл технологиятын киинигэр (РЦПТ)улахан экспертизаны ситиһиилээхтик ааспыта.
Ол түмүгэр «Таҥара чэйэ» диэн хара баайхабай уонна боҕуруоскай оттоох чэйбит «За новый продукт в линейке производства высококачественных безалкогольных напитков и чистой воды» хайысхаҕа кыайыылаах буолбута, «За производство высококачественных безалкогольных напитков» хайысхаҕа «Сарсыардааҥҥы саһарҕа» диэн от чэйэ иккис үрдэллээх Диплом, «Нуурал» уонна «Моонньоҕон» диэн от чэйдэр үһүс үрдэллээх Диплому ыбыттара.
Бу күннэргэ Москваҕа «Золотая осень-2023» XXV Арассыыйатааҕы агропромышленнай быыстапкаҕа кыттан үрдүк ситиһиилэннибит. “Рассвет” уонна “Нуурал” диэн чэбдигирдэр чэйдэрбит кыһыл көмүс мэтээлин ыллылар. Биһиги бу үлэбитигэр АГАТУ профессора, тыа хаһаайыстыба билимин дуоктара Степанов Константин Максимович көмөлөһөр, сүбэлиир-амалыыр. Онон науканы уонна практиканы бииргэ тутан үлэлээһин үтүө түмүктээх буолла.
Сивцева Л.С. дириэктэри агрохайысхаҕа солбуйааччы
